കണ്ണീരും പുഞ്ചിരിയും പിന്നെ ഞാനും .... !

മഴത്തുള്ളികളെ ,
നിങ്ങളെ നോക്കി കുറെ നേരം ഇങ്ങനെ ഇരുന്നു ...
ഇനി ഒരു കവിത എഴുതിയാലോ ?
നിങ്ങളെ കുറിച്ച് , ഈ മഴത്തുള്ളികളെ കുറിച്ച് ..
ഈ മഴത്തുള്ളികള്‍ എത്രയുണ്ടോ ..
അത്രയും അധികം കവിതകളും ഉണ്ട്  ..
നിങ്ങളെ കുറിച്ച് , ഈ മഴത്തുള്ളികളെ കുറിച്ച് ..
എന്നാല്‍ , പാവം ആ മഴവില്ലിനെ കുറിച്ച് ,
ആകെ ഏഴെണ്ണം ...!!!
അതുകൊണ്ട് .....

'പല്ലിമുട്ട' കള്‍ ..!

പൊട്ടിയ ബലൂണിന്റെ ചെറുകഷ്ണം എടുത്ത് , ചുണ്ടില്‍ വച്ച്
 വായു അകത്തേക്ക് വലിച്ച്‌ വീര്‍പ്പിച്ച്...
അത് മെല്ലെ തിരിച്ചു 'പല്ലിമുട്ട' കള്‍ ഉണ്ടാക്കി ..
ഇടംകൈയ്യുടെ വ്യാഴമണ്ഡലത്തില്‍
ആവര്‍ത്തിച്ചു ഉരസുന്ന നേരത്തുള്ള ആ ശബ്ദം .. !
ഇപ്പോഴും വല്ലാതെ അലോസരപ്പെടുത്തുന്നു....
ചില  ഓര്‍മ്മകള്‍   പോലെ ..!

www.abiprayam.com 

അവളും ഇവളും - (ഒരു താരതമ്യ പഠനം)

 

അന്ന് ഞാന്‍ അവളോട്‌ ചോദിച്ചു,

എന്നെ ഇഷ്ടപ്പെടാനുള്ള കാരണം ...?

എപ്പോഴും പുഞ്ചിരിക്കുന്ന ഈ മുഖം

അതായിരുന്നുവെത്രേ  അവള്‍ക്കെന്നുമിഷ്ടം ...!

 

ഇന്ന് ഞാന്‍ ഇവളോട്‌ ചോദിക്കുന്നു

എന്നെ ഇഷ്ടപ്പെടാനുള്ള കാരണം ..?

ഒരിക്കലും ചിരിക്കാത്ത ഈ ഗൌരവക്കാരനെ

ഇഷ്ടപ്പെടുവാനാണെത്രേ  ഇവള്‍ക്കെന്നുമിഷ്ടം ...!

ഒരു കുട്ടിക്കഥ പോലെ ...!

' മണ്ണാങ്കട്ടയും കരിയിലയും എന്ന കഥയില്‍  സെക്സിന്റെ  അതിപ്രസരം '
എന്ന വിഷയത്തില്‍  ചൂടേറിയ ഒരു സംവാദം ...!
അത് അരുതെന്ന് പറയുന്നവരും ,
കിട്ടാത്ത മുന്തിരി പുളിക്കും എന്ന് പറയുന്നവരും ഒരു വശത്ത് ..!
പന്തയം വച്ചുള്ള മാരത്തോണില്‍
വയാഗ്ര കഴിച്ചോടിയ ആമയെ ന്യായീകരിക്കാനാകാതെ മറ്റു ചിലര്‍ ...!
കയ്യിലെ എല്ലിന്‍ കഷ്ണം മറന്ന്...
നിഴലിനെ വെട്ടിപ്പിടിക്കാന്‍ ശ്രമിക്കുമ്പോള്‍ ..
ജീവിതം ഒരു കുട്ടിക്കഥ പോലെ ...!

മാറ്റമില്ലാത്തത് സഖാവ് പഥികന് മാത്രം ....!!

പ്രണയം വിപ്ലവം ആണെന്ന് കരുതി
എന്റെ ചാരെയിരുന്നു കവിത എഴുതിത്തുടങ്ങിയ
സഖാവ്  പഥികന്റെ കയ്യില്‍ അവര്‍
ആരുമറിയാതെ  ഒരു  ചെങ്കൊടി നല്‍കി ..!

എട്ടു മണിക്കൂര്‍ വിശ്രമം , ശേഷം ഫോണ്‍ വിളി, പിന്നെ
എട്ടു മണിക്കൂര്‍ ചാറ്റിംഗ് എന്നീ മിനിമം ആവശ്യവുമായി
അവര്‍ കേരളത്തില്‍ ഹര്‍ത്താല്‍ നടത്തി ,
പഥികന്‍ വോട്ട് ആന്‍റ് ടോക്കില്‍ അതിഥിയായെത്തി ..!

അവനു നഷ്ടപ്പെടാന്‍ ഒന്നുമില്ല ഒരല്പം വിശ്വാസം മാത്രം ..!
എന്നാല്‍ , വിശ്വാസികള്‍ അവനെയൊരു കുഞ്ഞാടാക്കി .
അവന്‍ വളര്‍ന്നു ..., ഒടുവില്‍ ആ ദിനം വന്നെത്തി ...
സഖാവ് പഥികന്റെ  ധീരരക്തസാക്ഷി ദിനം ...!

ഇതേ ദിനത്തില്‍ പഥികന്‍ വാഴ്ത്തപ്പെട്ടവനായി
മനോരമ സെന്‍റ് പഥികനെ കുറിച്ച് മുഖപ്രസംഗമെഴുതി ,
ദീപിക സപ്ലിമെന്റിറക്കി ...എന്നാല്‍  സമരപോരാട്ടങ്ങളുടെ
പഴയ ചിത്രങ്ങള്‍ സഹിതം ദേശാഭിമാനി ഓര്‍മ്മക്കുറിപ്പെഴുതി ...
"മാറ്റമില്ലാത്തത് ....!!

പെണ്ണെഴുത്ത്‌ ...!

 കൂട്ടുകാരി .... ഞാന്‍  ഒരു  കവിത  എഴുതട്ടെ ....!
എന്നിട്ട്  നിനക്ക്  ഞാനത്    അയച്ചു തരാം ....!!
ആ കവിത  നീ  നിന്റെ പേരില്‍ 
'ഫേസ് ബുക്കി'ല്‍ ഒന്ന് പോസ്റ്റ്‌ ചെയ്യാമോ  ..?

എന്റെ കവിതയെ ഒരു അമ്പത് പേര്‍ എങ്കിലും
ഒന്ന്  ഇഷ്ടപ്പെടുന്നത് കാണാന്‍ ...!!!
ഒരു മുപ്പതു പേര്‍  എങ്കിലും  അതിനെ കുറിച്ച് 
നല്ല അഭിപ്രായങ്ങള്‍ പറയുന്നത്  കേള്‍ക്കാന്‍ ...
കൊതിയാകുന്നു .... .! സത്യം . .!!

എന്റെ ഇഷ്ടം ...!

 

പുതുമഴ പെയ്യുമ്പോഴുള്ള കുളിരിനെക്കാള്‍
എനിക്കിഷ്ടം ആ മണ്ണിന്റെ  മണമാണ് ...!
കൂജയിലെ വെള്ളത്തിന്റെ കുളിരിനെക്കാള്‍
എനിക്കിഷ്ടം ആ മണ്ണിന്റെ രുചിയാണ്..!!
കൈകോര്‍ത്തു നടന്ന പ്രണയത്തിന്റെ കുളിരിനെക്കാള്‍
എനിക്കിഷ്ടം ആ പെണ്ണിന്റെ ......... !!