ഇന്നാണ് നമ്മുടെ രാജകുമാരിയുടെ സ്വയംവരം ...
കുമാരി അണിഞ്ഞൊരുങ്ങി നില്ക്കുന്നത് കണ്ടപ്പോള്
എന്റെയുള്ളിലും എങ്ങുമില്ലാത്ത സന്തോഷം ...
പക്ഷെ , ആ കണ്ണുകള് കലങ്ങിയത് കണ്ടപ്പോള് ...!!
അറിയാതെ മനസ്സു ചോദിക്കുന്നു ...
എന്ത് പറ്റി നമ്മുടെ രാജകുമാരിക്ക് .... ?
കുമാരിക്ക് എന്നും ഇഷ്ടം ഈ പുഴകളെ സ്നേഹിക്കുന്ന ,
മലകളെ സ്നേഹിക്കുന്ന ഒരാളെ ....
ഈ പൂക്കളെ സ്നേഹിക്കുന്ന ,
പൂമ്പാറ്റകളെ സ്നേഹിക്കുന്ന ആരോ ഒരാളെ ... !!
അന്യ രാജ്യത്തെ രാജാക്കന്മാര് വന്നിരിക്കുന്നു ,
രാജകുമാരന്മാര് വന്നിരിക്കുന്നു ...
അവരില് ചിലര് നമ്മുടെ നാടിനെ ആക്രമിച്ചവര് ...
നമ്മുടെ നാടിനെ കൊള്ളയടിച്ചവര് ...!!
എന്നിട്ടും ബന്ധുക്കള് പറയുന്നു ....
'കുമാരി ആ വെളുത്ത നിറമുള്ള രാജകുമാരനെ കണ്ടോ ...?
നീ ആ കുമാരനെ തന്നെ വരിക്കുക ....
അവനാണ് കൂടുതല് സമ്പന്നന് ....!
അവനാണ് കൂടുതല് സൈന്യമുള്ളവന് ..!!
നിന്റെ സൗന്ദര്യം കണ്ട് ... , നിന്റെ പാരമ്പര്യ സ്വത്ത് കണ്ട് ...
കടല് കടന്നു വന്നവനാണവന് ....
നീ ആ കുമാരനെ തന്നെ വരിക്കുക .... !!!'
പൂമാല വലിച്ചെറിഞ്ഞു രാജകുമാരി കുതറിയോടുമ്പോള്...
ആ കൈപിടിച്ച് ആ വെളുത്ത രാജകുമാരന് നല്കികൊണ്ട് ...
രാജാവ് ഉറക്കെ പറയുന്നു ....
''ഞങ്ങള്ക്കും മാറണം .. ഞങ്ങള്ക്കും സമ്പന്നരാകണം....
ഇന്നാണ് നമ്മുടെ രാജകുമാരിയുടെ സ്വയംവരം .. !!!''
7 comments:
എമെര്ജിംഗ് രാജകുമാരിയുടെ ഭാവിയില് എനിക്കുമുണ്ട് ആശങ്ക. എല്ലാം നന്നായി വരട്ടെ
എമെര്ജിംഗ് രാജകുമാരിയെ രക്ഷിക്കാന് ആരെങ്കിലും വരുമോ, കാത്തിരുന്നുകാണാം, അല്ലെ?
അല്ല നമുക്കും വേണ്ടേ ഈ സ്വയം ..........
സത്യം ...കുതറിയോടാന് കെല്പ്പില്ലാത്ത രാജകുമാരിമാര് ഇന്നും സ്വയംവരരക്തസാക്ഷികള്...
എമര്ജിങ് കേരളയെ കവിതയാക്കിയതു മനോഹരമായി. പക്ഷേ രാജകുമാരീ..സ്വന്തം കഴിവ് പ്രകടിപ്പിക്കാത്ത പ്രജകള്ക്ക്, ഈ വിവാഹം ചിലപ്പോള് നന്മ വരുത്തിയാലോ?...
ഈ മാഷ് ആള് കൊള്ളാമല്ലോ...സ്വയം വരം നന്നായി ട്ടോ ..ആശംസകളോടെ..
സ്വയംവരം നടക്കട്ടെ
Post a Comment